Acts 25
Paulo Mutulu no Anu Vaivaikala no Iou Fesuto
1Ioxe Fesuto muxali tila no xalee lia tila ne Iutaia. Anu muxali muxolu no xalee lia tila ne Kaisalia voxo tatalu, mukalu la anu mulai telo ne Ielusalemu. 2 aLa ta tatila noxi'a ta aili'i ilo'a ta tatila noxi'a ta Iutaia mixali mitulu no iou sou mixalixu vaivaikalasou susu ma'ia ane Paulo mu'oxonu. 3 bAne'i milinga pekia'u noxou Fesuto lexe ulomuxa'a sou uvulanu Paulo ulai ne Ielusalemu xo ane'i milalaxi mo miloo sou lexe ulai la ivau no vote'i. 4Ia Fesuto muavuti la mukolinu vaikala noxi'a aloxo 'o, “Paulo ne eni atetelisou uxolu lai ne Kaisalia. Ia eni melosi a sexasisi sou alai lai ne. 5La sou anu laixe lexe ngingi ngapalusi'a ta tatila mose'i noxinge ne ine'e sou noxi'a talai mo i'oxo pekia'unu vaikala sou susu utelo noxou mitema ne alai ne lexe anu mu'oxonu mii mose'i mususu.”6Anu ilo'a lexe ixolu voxo muxatele tatalu xe uasi la voxo mavulovexa, la sou anu muulaxune'i sou mulu'elai ne Kaisalia. Xe no anu voxo ane vile la, la anu muxolu sou mutilovosou vaivaikala, la sou anu muvikala pekia'u lexe ine'enu Paulo uxali no iou. 7 cXe no mine Paulo mune'e muxali, la ta Iutaia ane'i ane me'a ne Ielusalemu mine'e ne mitulu mixaliliiou sou mixalixu vaikala ta piena sou susu masumasua mutelo noxou e umomomo sou ane'i ivikala lexe anu manina no anu uasi. 8La sou Paulo muxilili la muvikala aloxo 'o, “Eni a'oxonu susu vile no anu lapuloto noxi'a ta Iutaia uasi mo a'oxonu susu vile no anu taasou lolotu tatila noxou Lataua uasi mo a'oxonu susu vile noxou Kaisari uasisi manina.”
9Ia Fesuto mumasaxa lexe u'oxo ta Iutaia tane'i laixe noxou, la sou muvikalanu Paulo aloxo 'o, “Lexe nini nemasaxa la nalaitelo ne Ielusalemu mo natulu no ieli mo alomusou vaivaikala noxine sou susu ma'ia ane ane'i mitelonu noxine ne?” 10Ioxe Paulo muavuti la mulivunoxu tali'i noxou aloxo 'o, “Eni vaimomo 'o si a atutulu noxou Kaisari no nano no anu tani sou utilovosou vaivaikala noxi'a ta mitema 'o. La sou anu laixe lexe nini natilovosou vaivaikala noxilo ano 'o. Eni a'oxonu susu vile noxi'a ta Iutaia uasi aloxo nini mene nelavusou laixe ne. 11Ia lexe eni e'oxonu susu vile umomomo sou eni asoli la eni amomomo sou a'ume uasi. Ia lexe vaivaikala ane ta Iutaia mine'e mitelo noxilo ne anu manina uasi, la itema vile umomomo sou u'italoleli alai no avo'a uasi. Eni amasaxa lexe Kaisari ulomusou vaikala noxilo.” 12Ioxe ili'i no mine Fesuto muvivikala noxi'a ta mitema ane'i ane sou ilosou xavutala ne mukalu, la sou anu muvikalanu Paulo aloxo 'o, “Nini nemasaxa lexe Kaisari ulomusou vaikala noxine. La sou nini nalai noxou.”
Fesuto Mutali'isou Tatananu Tuala Axulipa sou Ulomusou Vaivaikala Noxou Paulo
13Voxo mose'i mupolo mukalu, la tatananu tuala e Axulipa ne ilee Belunike mixali ne Kaisalia sou imaxa'u latiloxo noxi'a ulai noxou Fesuto. 14 dXe no mine ane'i mixolu voxo ta piena lai ne, la Fesuto muvikalasou tu'umaxu noxou Paulo mulai noxou tatananu tuala. La anu muvikala aloxo 'o, “Itema vile e uxoxolu 'o ne Peliki mumulaxu no anu taasou navunavu mo a uxoxolu o ia anu mulai. 15La no mine eni elai ne Ielusalemu, la ta tatilasi'a ta aili'i ilo'a ta tatila noxi'a ta Iutaia mixalixu vaikala sou susu e mitelonu noxou. Mo milinga noxilo sou avikala lexe anu itema sou umamulo lapuloto. 16Ia eni evikalane'i lexe, ‘'Ilixo noxi'a ta Romu aloxo ne uasi. Ia anu laixe lexe itema ne ilo'a ta mitema ane mitelonu vaivaikala mutelo noxou ne ine'e itulu no anu vaivaikala, la anu umomomo sou muxilili la muvikala no anu vaivaikala ma'ia ane ane'i mitelo noxou ne.’ 17La sou no mine ane'i mimuleli lai ne, la eni alapu voxo sou mii ane ne uasi. Ia no anu voxo ane vile ili'i, la eni exolu sou e'avamolu pita sou vaivaikala. La sou evikala pekia'u sou ine'enu itema ne no nano. 18Xe no mine ta mitema sou itelo vaikala miavuti sou ivikala, la ane'i mitelo vaikala sou susu vile uasi ane eni exavutala lexe ane'i itelo vaikala no anu. 19Ia ane'i ilo'a anaxa'a sou mii mose'i no anu lalotui'a mo sou mitema ane musoli e ualasou lexe Iesu, ia Paulo mua'alo lexe Anu mumauli. 20La eni ne xavutalaxeni lamana sou atilovosou mo axalisou mii ane loxo ne tava'u uasi. La sou eni etali'isou aloxo 'o lexe anu umasaxa la ulai ne Ielusalemu, mo utulu no anu vaivaikala sou susu ane ane'i mitelonu noxou ne lai ne. 21Ia xo Paulo mu'oxolinga noxou sou lexe utetelisou uxolu utalo no mine tila noxi'a ta Romu molu ulomusou vaikala noxou. La sou eni evikala pekia'u sou lexe itetelisou ixolu utalo no mine eni apalusou ulai noxou Kaisari.” 22Aloxo ne, la sou Axulipa muvikala mulai noxou Fesuto lexe, “Eni emasaxa sou lexe eni melo alomusou vaikala noxou mitema ane ne.” La anu mukolinu lexe “Ne'iela, la sou nini nalomusou vaikala noxou.”Paulo Mutulu no Iou Axulipa
23No anu voxo ane vile, la Axulipa ilee Belunike mimulaxu tokolomoi'a lailaixe, ka ilo'a kisi'a ta mitema sou 'oto'oto mo ta mitema miulaxu tuala tatila mulai no nano no tani sou pita. Xe no anu vaikala pekia'u noxou Fesuto, la ane'i mine'e mi'unanu Paulo. 24Xe Fesuto muavuti la muvikala aloxo 'o, “Tatananu tuala Axulipa, mo ngingi ukalusi e ngene'e ngepita 'o, ngingi ngamaisou itema ne. Ta Iutaia la'oluxa'a lololi ne mixalixu masaxa noxi'a silo ne Ielusalemu mo lai ne Kaisalia, la ane'i mi'ava'ava lexe anu umomomo sou uxolu umauli usuku la uasi. 25Ia eni axalisou lexe anu u'oxonu mii vile ane anu umomomo sou anu usoli no anu uasi. Ia xo anu molu mulinga mulai noxou tila noxi'a ta Romu. La sou eni emuxaxu xavutala lexe apalusou ulai ne Romu. 26Ia eni alavusou mii vile manina sou Paulo, sou eni akaukavunu mo ulai noxou tila ne uasi. Aloxo ne la sou eni ene'enu no ieni tatananu tuala Axulipa, mo ane'i mukalusi 'o. Mo sou lexe nenge nenge'a talomusou lexe taxalisou tava'u susu ne, la sou eni akaukavunu ulai. 27Xo eni exavutala lexe anu laixe uasi sou tapalusou itema sou uno'u navunavu vitanisi, io taa'alo lamana no anu vaivaikala sou susu ane mitelo noxou uasisi, uasi.”
Copyright information for
ATA